පොත් කියන්නේ සබද, ඒ වගේ දේකට !

පොත් කියන්නේ සබද
මේ වගේ දේකට

තත්පරෙන් ඇසිල්ලක්
 වගේ එක මොහොතක
හදවතේ නහර හැම
ගල් කරන දේකට

භාවනාවක් වගේ
සති ගණක් එක තැන
අපේ හිත් නවත්තන
හරි පුදුම දේකට

හොදටෝම දැන දැනත්
මේව බොරු දේ බව
නෙත් වලින් කදුලු බිදු
වට්ටවන දේකට

මුතු කරාඹුව සමග
හොග්වෝට්ස් ලෝකෙක
හිත අතරමං කරපු
සොදුරුතම දේකට

ඕක ලොකු පිස්සුවක්
කියා නුඹ කීවට
පොත් කියන්නේ
සබද ඒ වගේ දේකට

ගෙදර ❤

මං හරිම  ආසයි
 ගෙදර යනවා කියා දැනෙනවට
හුරු පුරුදු සුළං රැළි
හමාගෙන ඇවිත් ගත වදිනවට..

හුරු පුරුදු නම් ගහපු
බස් එකක් දෙකක් මග හැරෙනවට
හුරුපුරුදු මුහුණකින්
"ගෙදර යනවා" වගේ ඇහෙනවට

හුරුපුරුදු ගස් කොලන්
මල් දරා සැරසිලා සිටිනවට
හුරුපුරුදු සිනාවක්
වැට අසල මග බලන් ඉන්නවට

මං හරිම ආසයි
ගෙදර යනවා කියා දැනෙනවට
ඒ හුස්ම පොද දිගේ
හදවතම මලක් වී පිපෙනවට