Friday, December 25, 2015

ඇහැළ


කහ පාට ඇහැළ පෙති වස්සමින් මඟ දෙපස
වඩින මැයි මාසයක හැලෙන මල් නිම් නොමැත
මුදු රේණු අතුරමින් රටා මවනා අරුම
පියෙන් පිය තබා යමි නොපාගා මල් යහන

බිම වැටී මිලින වෙන හැම ඇහැළ මලකටම
කතාවක් ඇත් කිසිම දිනෙක අමතක නොවන
තුරු මුදුන මත රැදී හිරුට මදහස පෑව
වතාවක් ඇවිත් ගිය වසන්තේ දිනක් ගැන

හෙමි හෙමින් බිම වැටී අතීතය අවුලුවන
පිණි කඳුළු වැහි සලන මේ ඇහැළ මල් මිසක
අන් කිසිත් කියාවිද අතීතය සතු දිනක
වෙන්වෙලා දුරක ගිය සොඳුරු කවි සිතක් ගැන

හදවතේ මැද මිදුලෙ රිදුම් තැන් සඟවාන
ලොවම ලස්සන කරයි නොවෙද මේ මල් පැහැය
බිම වැටෙන හෙට පිපෙන සියලු මල් හා එක්ව
සිනාසෙන අපූරුව කහ පාට සලුව ඇඳ....